शेतकऱ्यांनो लक्ष द्या! रब्बी पीक विमा योजना २०२५ जाहीर; ज्वारी, गहू, हरभऱ्यासह सहा पिकांचे संरक्षण करण्याची संधी

विशेष प्रतिनिधी:

राज्यात रब्बी हंगामाची लगबग सुरू असताना, शेतकऱ्यांसाठी एक अत्यंत महत्त्वाची बातमी समोर आली आहे. केंद्र सरकारची महत्त्वाकांक्षी ‘प्रधानमंत्री पीक विमा योजना’ (PMFBY) रब्बी हंगाम २०२५ करिता लागू करण्यात आली असून, यासाठी अर्ज भरण्याची प्रक्रिया सुरू झाली आहे. नैसर्गिक आपत्ती, रोगराई किंवा कीड प्रादुर्भावामुळे होणाऱ्या पिकांच्या नुकसानीपासून आर्थिक संरक्षण मिळवण्यासाठी शेतकऱ्यांनी विहित मुदतीत अर्ज करून आपल्या पिकांचा विमा उतरवावा, असे आवाहन कृषी विभागाकडून करण्यात आले आहे.

ADS किंमत पहा ×

या योजनेच्या प्रभावी अंमलबजावणीसाठी, राज्याचे दोन गटांमध्ये वर्गीकरण करण्यात आले आहे. यासाठी ‘एग्रीकल्चर इन्शुरन्स कंपनी ऑफ इंडिया’ (AIC of India) आणि ‘आयसीआयसीआय लोम्बार्ड’ (ICICI Lombard) या दोन विमा कंपन्यांची निवड झाली आहे. सध्या धाराशिव, बीड आणि लातूर या जिल्ह्यांमध्ये आयसीआयसीआय लोम्बार्ड कंपनीमार्फत १ नोव्हेंबरपासून अर्ज स्वीकारण्यास सुरुवात झाली आहे, तर उर्वरित जिल्ह्यांमध्येही ही प्रक्रिया लवकरच सुरू होणार आहे.