मंत्रिमंडळ बैठकीत २१ महत्त्वाचे निर्णय; अतिवृष्टी मदतीवरून प्रशासनाला खडसावले

सोलापूरमध्ये ३० हजार घरांच्या प्रकल्पाला कर सवलत, आरोग्य योजनांचा विस्तार, आणि तीन नवीन आर्थिक विकास महामंडळांना मंजुरी; मदत वाटपातील दिरंगाईमुळे मंत्री नाराज.

ADS किंमत पहा ×

विशेष प्रतिनिधी, मुंबई:

मुख्यमंत्री देवेंद्र फडणवीस यांच्या अध्यक्षतेखाली आज (४ नोव्हेंबर) राज्य मंत्रिमंडळाची बैठक पार पडली. या बैठकीत एकूण २१ महत्त्वाचे निर्णय घेण्यात आले असले तरी, अतिवृष्टीग्रस्त शेतकऱ्यांना मदत वाटपात होणाऱ्या दिरंगाईच्या मुद्द्यावरून वातावरण तापल्याचे दिसून आले. सत्ताधारी पक्षांतील वरिष्ठ मंत्र्यांनी प्रशासकीय अधिकाऱ्यांच्या कार्यपद्धतीवर तीव्र नाराजी व्यक्त केली, ज्यानंतर मुख्यमंत्र्यांना हस्तक्षेप करून अधिकाऱ्यांना कडक शब्दांत सूचना द्याव्या लागल्या.

अतिवृष्टी मदतीवरून खडाजंगी

मागील मंत्रिमंडळ बैठकीप्रमाणेच या बैठकीतही अतिवृष्टीग्रस्त शेतकऱ्यांच्या मदतीचा मुद्दा गाजला. मदत पोहोचत नसल्याने भाजप, शिवसेना आणि राष्ट्रवादी काँग्रेस या तिन्ही पक्षांतील मंत्र्यांनी प्रशासनाच्या ढिसाळ कारभारावर बोट ठेवले. “सरकारी काम आणि बारा महिने थांब,” अशी अवस्था झाल्याची टीका करत, राज्य सरकारचा प्रशासनावर वचक आहे की नाही, असा प्रश्न उपस्थित करण्यात आला. मंत्र्यांच्या आक्रमक पवित्र्यानंतर मुख्यमंत्री देवेंद्र फडणवीस यांनी हस्तक्षेप करत, मदत वाटपाच्या कामाला गती देण्याचे आणि दिरंगाई करणाऱ्यांवर कारवाई करण्याचे स्पष्ट आदेश प्रशासकीय अधिकाऱ्यांना दिले.

राज्यात थंडीची तीव्र लाट, १५ दिवस मुक्काम; पंजाबराव डख यांचा अंदाज

रब्बी पीक विमा २०२५: आता घरी बसल्या मोबाईलवरून भरा अर्ज, CSC सेंटरचे पैसे वाचवा; जाणून घ्या संपूर्ण प्रक्रिया

ADS किंमत पहा ×

मंत्रिमंडळ बैठकीतील प्रमुख निर्णय:

आरोग्य क्षेत्राला मोठे बळ:

महात्मा फुले जनआरोग्य योजनेचा विस्तार: राज्यातील नागरिकांना उत्तम आरोग्य सुविधा देण्यासाठी महात्मा फुले जनआरोग्य योजना आणि आयुष्मान भारत प्रधानमंत्री जनआरोग्य योजनेच्या उपचार यादीत मोठी सुधारणा करण्यात आली आहे. आता या योजनेत २,४०० गंभीर आजार आणि २,३९९ सर्वसाधारण आजारांवर उपचार मिळणार आहेत. उपचारांची मर्यादा ५ लाख आणि १० लाख रुपयांपर्यंत वाढवण्यात आली आहे.

ADS किंमत पहा ×
शहरी आरोग्य आयुक्तालय: राज्यात शहरी आरोग्य आयुक्तालय स्थापन करण्यास मंजुरी देण्यात आली, ज्यामुळे शहरी भागातील आरोग्य सेवा अधिक सक्षम होण्यास मदत होईल.
आयुष्मान कार्ड कर्मचारी: आयुष्मान कार्ड तयार करणाऱ्या कर्मचाऱ्यांच्या मानधनात वाढ करण्याचा निर्णय घेण्यात आला.
कंत्राटी कर्मचारी समायोजन: राष्ट्रीय आरोग्य अभियानातील १० वर्षे सेवा पूर्ण केलेल्या कंत्राटी कर्मचाऱ्यांचा नियमित पदांवर समावेश करण्याच्या निर्णयात दुरुस्ती करण्यास मान्यता देण्यात आली.

गृहनिर्माण आणि पायाभूत सुविधा:

सोलापुरात ३० हजार घरे: सोलापूर जिल्ह्यातील कुंभारी गावात प्रधानमंत्री आवास योजनेअंतर्गत असंघटित कामगारांसाठी उभारल्या जाणाऱ्या ३० हजार घरांच्या प्रकल्पाला कर सवलत देण्याचा निर्णय घेण्यात आला.
विरार-अलिबाग वाहतूक मार्गिका: विरार-अलिबाग बहुउद्देशीय वाहतूक मार्गिका प्रकल्पासाठी हुडकोकडून मिळणाऱ्या कर्जाला शासन हमी देण्यास मान्यता देण्यात आली. हे कर्ज भूसंपादन खर्चासाठी वापरले जाणार आहे.
मुंबईतील भूखंड भाडेपट्ट्यावर: मुंबईतील वांद्रे गावातील सरकारी जमीन ९९ वर्षांच्या भाडेपट्ट्यावर देऊन अतिरिक्त भूखंडावर आवश्यक सुविधा उभारण्यास मान्यता देण्यात आली.

आर्थिक आणि सामाजिक विकास:

तीन नवीन आर्थिक विकास महामंडळे: राज्यात परशुराम, महाराणा प्रताप आणि वासवी कन्यका या तीन नवीन आर्थिक विकास महामंडळांच्या योजनांना मंजुरी देण्यात आली.
मत्स्यव्यवसायाला कृषीचा दर्जा: मत्स्यव्यवसायाला कृषी समकक्ष दर्जा देण्याचा महत्त्वपूर्ण निर्णय घेण्यात आला. यामुळे मच्छीमार, मत्स्यसंवर्धक आणि मत्स्य कास्तकारांना बँकेच्या कर्जावर ४% व्याज परतावा मिळणार आहे.

शिक्षण आणि इतर महत्त्वाचे निर्णय:

नागपूर LIT विद्यापीठाला निधी: नागपूर येथील लक्ष्मी नारायण अभिनव तंत्रज्ञान (LIT) विद्यापीठाला २०२५ ते २०३० या कालावधीसाठी दरवर्षी ७ कोटी रुपयांचा निधी देण्यास मान्यता देण्यात आली.
चंद्रपुरात नवीन तंत्रनिकेतन: चंद्रपूर जिल्ह्यातील मुळ येथे नवीन शासकीय तंत्रनिकेतन सुरू करण्यास मंजुरी देण्यात आली. यासाठी ३९ शिक्षक आणि ४२ शिक्षकेतर पदांनाही मान्यता देण्यात आली आहे.
जमीन महसूल संहितेत सुधारणा: महाराष्ट्र जमीन महसूल संहिता १९६६ मध्ये सुधारणा करून अकृषिक कर आणि वापर परवानगीसंबंधीच्या तरतुदींमध्ये बदल करण्यास मंजुरी देण्यात आली.

या बैठकीत अनेक धोरणात्मक निर्णय घेण्यात आले असले तरी, शेतकऱ्यांच्या प्रश्नांवरून मंत्र्यांनी दाखवलेली आक्रमकता चर्चेचा विषय ठरली आहे.

ताज्या बातम्या

राज्यात थंडीची तीव्र लाट, १५ दिवस मुक्काम; पंजाबराव डख यांचा अंदाज

राज्यात थंडीची लाट, पारा ९ अंशांवर; ‘या’ जिल्ह्यांमध्ये कडाका आणखी वाढणार!